Ավստրիայի էլեկտրական ցանցերի օպերատոր Austrian Power Grids (APG) ընկերությունը ներկայացրել է «Ավստրիական էներգետիկ հսկաներ» (Austrian Power Giants) նախագիծը։
Նախաձեռնության շրջանակում նախատեսվում է ստեղծել էլեկտրահաղորդման գծերի (ԷՀԳ) յուրահատուկ հենասյուներ՝ կենդանիների կերպարներով, Ավստրիայի ինը դաշնային երկրներից յուրաքանչյուրի համար առանձին ձևավորմամբ։
Նախագծի գաղափարը պարզ է․ մարդկանց մեծ մասի համար էլեկտրահաղորդման գծերը հաճելի չեն։ Դրանք ոչ միայն աղմուկ են ստեղծում և առաջացնում էլեկտրամագնիսական դաշտեր, այլև հաճախ խաթարում են բնական լանդշաֆտները (թեև կան նաև մարդիկ, որոնք դրանց մեջ տեսնում են յուրահատուկ գեղեցկություն)։
Սա պարզապես զգացմունքային վերաբերմունք չէ․ զարգացած երկրներում տեղական համայնքները հաճախ մերժում են նոր էլեկտրահաղորդման գծերի կառուցման նախագծերը։
Austrian Power Grids-ում կարծում են, որ այս հակազդեցության մի մասը հնարավոր կլինի մեղմել, եթե լարերը պահող հենասյուները լինեն ոչ միայն ֆունկցիոնալ, այլև հետաքրքիր տեսք ունենան՝ միաժամանակ արտացոլելով տվյալ տարածաշրջանի առանձնահատկությունն ու ինքնատիպությունը։
