Եվրոպայի ամենամեծ ցամաքային կաթնասունը՝ եվրոպական բիզոնը, վերադարձել է Իսպանիայի Իբերական բարձրավանդակ՝ բնության վերականգնման ծրագրի շրջանակում, որը նպատակ ունի նվազեցնել անտառային հրդեհների ռիսկը և խթանել կենսաբազմազանությունը։
Այս շաբաթ Գվադալախարա նահանգի Էլ Ռեկուենկո գյուղի մոտակայքում ազատ են արձակվել ինը բիզոններ։ Նախագծի հեղինակների խոսքով՝ բիզոնները համարվում են հիմնարար տեսակներ, որոնք իրենց արածեցման և տարածքի ձևափոխման միջոցով նպաստում են այլ բույսերի և կենդանիների համար բարենպաստ միջավայրի ստեղծմանը։
Հետազոտողները նախատեսում են հետևել նորաբնակ կենդանիներին՝ ուսումնասիրելու, թե ինչպես կարող է եվրոպական բիզոնը նպաստել միջերկրածովյան էկոհամակարգերի վերականգնմանը։
Նմանատիպ վերաբնակեցման ծրագրեր իրականացվում են նաև եվրոպական այլ երկրներում, այդ թվում՝ Մեծ Բրիտանիայում։ Rewilding Europe կազմակերպության տվյալներով՝ վերջին տասնամյակում եվրոպական բիզոնների թվաքանակը մոտ 2500-ից աճել է մինչև շուրջ 9000։ Համեմատության համար նշվում է, որ 1927 թվականին ամբողջ աշխարհում՝ կենդանաբանական այգիներում և մասնավոր հավաքածուներում, կենդանի էր մնացել 60-ից պակաս բիզոն։
Էլ Ռեկուենկոյի քաղաքապետ Էնրիկե Կոլլադան նշել է, որ ակնկալվում է՝ բիզոնների արածեցումը և անտառներում շարժումը կնպաստեն այրվող բուսականության նվազեցմանը և կթուլացնեն խոշոր անտառային հրդեհների առաջացման վտանգը։ Նրա խոսքով՝ նախագիծը կարող է նաև խթանել զբոսաշրջությունը և ստեղծել նոր տնտեսական հնարավորություններ տեղական համայնքի համար։
