Մալդիվները դարձել են աշխարհի առաջին երկիրը, որը ներդնում է համազգային, սերունդներին վերաբերվող ծխելու արգելք․ նոր օրենքի համաձայն՝ 2007 թվականի հունվարի 1-ից հետո ծնված անձանց ընդմիշտ արգելվում է ծխել կամ ձեռք բերել ծխախոտային արտադրանք երկրի տարածքում։ Այս սահմանափակումը վերաբերում է ոչ միայն երկրի քաղաքացիներին, այլև զբոսաշրջիկներին։
Առողջապահության նախարարությունը անցած հանգստյան օրերին հայտարարեց, որ երիտասարդ սերնդի համար Մալդիվներում ծխախոտի օգտագործումը, գնումը կամ վաճառքը կհամարվի անօրինական։ Մանրածախ վաճառողները պարտավոր են լինելու վաճառքից առաջ ստուգել գնորդների տարիքը։
Նախարարության հայտարարության մեջ նշվում է, որ այս որոշումը արտացոլում է կառավարության հաստատակամ հանձնառությունը՝ պաշտպանելու երիտասարդներին ծխախոտի երկարաժամկետ վնասակար ազդեցությունից։
Մալդիվների Հանրապետության Ծխախոտի դեմ պայքարի ազգային խորհրդի փոխնախագահ Ահմեդ Աֆաալը BBC-ին տված հարցազրույցում նշել է, որ այս քայլը շարունակությունն է անցյալ տարի ներդրված համազգային վեյփինգի արգելքի և այն կարևոր քայլ է՝ դեպի ծխախոտ չօգտագործող սերունդ ձևավորելը։
«Սա միայն ծխախոտի մասին չէ», — նշել է Աֆաալը։ «Ժամանակակից վեյփ սարքերը հատուկ կերպով մշակված են երիտասարդների ուշադրությունը գրավելու համար և աստիճանաբար կախվածությունը դարձնում են սովորական երևույթ՝ չնայած դրանց առողջությանը հասցվող ակնհայտ վնասին»։
Նոր սահմանափակումը վերաբերում է ծխախոտի բոլոր տեսակներին և համապատասխանում է Մալդիվների ստանձնած պարտավորություններին՝ Առողջապահության համաշխարհային կազմակերպության Ծխախոտի դեմ պայքարի շրջանակային կոնվենցիայի շրջանակում։ ԱՀԿ-ն այդ կոնվենցիան բնութագրում է որպես համաշխարհային արձագանք ծխախոտի համաշխարհային համաճարակին։
2024 թվականին Մալդիվները արդեն իսկ կտրուկ քայլ էին ձեռնարկել՝ ամբողջությամբ արգելելով էլեկտրոնային ծխախոտների և վեյփինգի արտադրանքի ներմուծումը, վաճառքը, պահպանումը, օգտագործումը և տարածումը՝ անկախ անձի տարիքից։ Պաշտոնյաները այժմ այդ որոշումը դիտարկում են որպես սերունդների համար նախատեսված ավելի լայն արգելքի հիմք։
Սահմանափակումը կիրառելով նաև ապագա սերունդների և երկրի հյուրերի նկատմամբ՝ Մալդիվները հստակ ազդակ են ուղարկում․ երկրի երկարաժամկետ նպատակը ծխախոտից ազատ հասարակություն ձևավորելն է։
